ភ្នំពេញ៖ ក្រសួងបរិស្ថានសហការជាមួយអង្គការពាក់ព័ន្ធបានប្រកាសបើកយុទ្ធនាការអន្ទាក់សូន្យនៅតំបន់ការពារធម្មជាតិកម្ពុជាក្នុងខេត្តចំនួន៦ ដើម្បីផ្សព្វផ្សាយអប់រំអំពីផលប៉ះពាល់ដោយសារអន្ទាក់ទៅលើជីវិត សត្វ និងជីវិតមនុស្ស។

ក្នុងសន្និសីទសារព័ត៌មានកាលពីថ្ងៃទី០២ ខែមីនា ឆ្នាំ២០២២ ដែលមានការចូលរួមពីតំណាងអង្គការដៃគូដែលធ្វើការងារពាក់ព័ន្ធនឹងសត្វព្រៃចំនួន រដ្ឋលេខាធិការក្រសួងបរិស្ថាន លោក នេត្រ ភក្ត្រា បានថ្លែងថា «យុទ្ធនាការអន្ទាក់សូន្យនៅក្នុងតំបន់ការពារធម្មជាតិកម្ពុជា» នេះគឺជាការផ្តួចផ្តើមនិងដឹកនាំរៀបចំដោយក្រសួងបរិស្ថានដោយមានការចូលរួមរបស់អង្គការអន្តរជាតិដៃគូក្នុងកិច្ចការអភិរក្សធនធានធម្មជាតិ។

យុទ្ធនាការនេះ ចាប់ផ្តើមជាផ្លូវការនៅថ្ងៃទី៣ ខែមីនា ឆ្នាំ២០២២ និងប្រព្រឹត្តទៅរយៈពេល៦ខែនៅក្នុងបណ្តាខេត្តខាងកើតទន្លេមេគង្គ រួមមាន ខេត្តក្រចេះ ស្ទឹងត្រែង រតនគិរី មណ្ឌលគិរី ព្រះវិហារ និងខេត្តកំពង់ធំ ដោយក្នុងអំឡុងពេល ៦ខែនេះ អាជ្ញាធរមូលដ្ឋាននិងសហគមន៍ត្រូវរួមគ្នាទប់ស្កាត់ក៏ដូចជាអប់រំផ្សព្វផ្សាយឱ្យពួកគាត់យល់ច្បាស់ពីច្បាប់ ពីទោសទណ្ឌនិងរួមទាំងតម្លៃរបស់សត្វព្រៃ។

លោកបន្តថា ការបើកយុទ្ធនាការអន្ទាក់សូន្យនៅថ្ងៃទី០៣ ខែមីនា ស្របពេលដែលពិភពលោកប្រារព្ធទិវាសត្វព្រៃពិភពលោកផងដែរ និងមានគោលបំណងសំខាន់រួមមាន ការផ្សព្វផ្សាយអប់រំអំពីផលប៉ះពាល់ដោយសារអន្ទាក់ទៅលើជីវិត សត្វ និងជីវិតមនុស្ស ពង្រឹងការអនុវត្តច្បាប់ ការផ្លាស់ប្តូរឥរិយាពលរដ្ឋឱ្យបង្កើនការប្រតិបត្តិមេត្រីបរិស្ថាន ស្រឡាញ់សត្វព្រៃជីវៈចម្រុះ និងការលុបបំបាត់ការបរបាញ់សត្វ ការដាក់អន្ទាក់ខុសច្បាប់ និងការលុបបំបាក់ការជួញដូរសាច់សត្វព្រៃ ក៏ដូចជាបង្កើនសុវត្ថិភាពដល់សត្វព្រៃគ្រប់ប្រភេទ។

លោកបន្ថែមថា យុទ្ធនាការអន្ទាក់សូន្យនឹងក្លាយជាផ្នែកមួយនៃការជួយបញ្ជ្រាបការយល់ដឹងរបស់ប្រជាពលរដ្ឋ និងចូលរួមកាត់បន្ថយចំនួនអន្ទាក់នៅក្នុងតំបន់ការពារធម្មជាតិ៕